Num 30 | NdeIBE | STEP | UMosi wathi kwabazinhloko zezizwana zabako-Israyeli: “Nanku ukulaya kukaJehova:

Numbers 30

Izifungo zabesifazana

1 UMosi wathi kwabazinhloko zezizwana zabako-Israyeli: “Nanku ukulaya kukaJehova: 2 Nxa indoda isenza isinqumo kuJehova loba isenza izifungo iziphe icala ngokuzimisela, akumelanga yephule isithembiso sayo kodwa kumele igcwalise ngokwenza konke ekutshiloyo.

3 “Nxa intombazana elokhu isezandleni zabazali bayo isenza isinqumo kuJehova loba iziphe icala ngokuzimisela 4 kuthi uyise abesesizwa ngesinqumo sayo loba ukuzimisela kwayo kodwa uyise angaze atsho lutho ngalokho kuyo, kutsho ukuthi izinqumo zayo kanye lokuzimisela kwayo njengokuzethesa kwayo lowomlandu kuzakuma kunjalo. 5 Kodwa uyise angakuzwa lokho ayalise asikho isinqumo lesimiso sayo esizasebenza; uJehova uzayikhulula leyontombazana ngoba yalelwe nguyise.

6 “Nxa ingenda ngemva kokwenza isinqumo loba kube ngemva kokuba indebe zayo zike zatsho isithembiso ngokucunuka izethesa icala

7 kuthi indoda yayo ikuzwe lokho kodwa ingatsho lutho kuyo, lokho-ke kutsho ukuthi izinqumo zayo loba izithembiso eyazethesa icala ngazo zizakuma njalo. 8 Kodwa nxa umkayo eyalela ekukuzweni kwakhe, kutsho ukuthi umkayo usesuse icala lesinqumo loba ukuzimisela ngokucunuka kwayo, ngakho uJehova uzayikhulula.

9 “Loba yisiphi isinqumo loba ukuzimisela okwenziwe ngumfelokazi loba umfazi owehlukana lendoda yakhe kuyisibopho kuye.

10 “Nxa owesifazana ohlala lomkakhe esenza isinqumo loba ezethesa icala lesithembiso ngesifungo 11 kuthi indoda yakhe ikuzwe kodwa ingaze yatsho lutho kuye ingamaleli, kutsho ukuthi izinqumo zakhe zonke lezithembiso zokuzethesa icala zizakuma zinjalo. 12 Kodwa indoda yakhe ingakuzwa lokho imalise, kutsho ukuthi akukho isinqumo loba isithembiso esivela endebeni zakhe esizakuma njalo.

13 Indoda yakhe ilakho ukuqinisa loba ukwala loba yisiphi isinqumo azasenza loba yisiphi isifungo sesithembiso sokuzidela kwakhe.

14 Kodwa nxa indoda yakhe ingatshongo lutho kuye ngakho okwezinsuku, kuzakutsho ukuthi iyaziqinisa zonke izinqumo loba izithembiso eziyisibopho kowesifazana. Umyeni wakhe uyakuqinisa lokho ngokungatsho lutho kuye ekukuzweni kwakhe lokho. 15 Kodwa-ke, nxa angakwenqabela ngemva kwesikhathi ezwile ngakho, kutsho ukuthi usethwele icala lakhe.”

16 Le yiyo imithetho eyaphiwa uMosi nguJehova emayelana lokuhlalisana kwendoda lomkayo, njalo phakathi kuka yise lendodakazi yakhe esakhulayo elokhu isesezandleni zakhe.